Salesianos Ourense

Como dando cumprimento a parábola evanxélica do sementador, constatamos que moito medrou a semente do carisma salesiano en Ourense ao longo destes cen anos. Moitos dos pais e avós dos alumnos pasaron por estas aulas, estes patios, esta fermosa igrexa, ou polo centro xuvenil os máis novos. Cantos cambios ao longo deste tempo, cantos bos recordos desas épocas e da xente coa que convivimos. Correspóndenos tomar o relevo e seguir coa antorcha encendida outros cen anos máis, porque as celebracións teñen algo de morriña, pero sempre miran cara ao futuro con ilusión.

Sabemos que non estamos sos na aventura da vida, que camiñamos xuntos, axudándonos, apoiándonos, animándonos, medrando, levantándonos dos tropezos da vida, avanzando, superando as dificultades e inclemencias que atopamos ao longo do camiño. Ese debe ser o noso talante coma peregrinos, capaces de superar as incomodidades do frío, da calor, da fame, da sede, porque o final do camiño compensará con creces todas as dificultades atopadas.

Antes de rematar pídovos a todos que contempledes a ilustración do lema con detalle, reparando na ledicia que reflicten os rostros, na mensaxe dos carteis que portan algúns, no Don Bosco peregrino, ... Unha imaxe vale por mil palabras, pero neste caso vale por dúas mil.

Que comecedes o peregrinar por este novo curso con bo pé, con optimismo e dando o mellor de vós mesmos. Grazas a todos pola vosa colaboración e que os bos desexos iniciais se vexan cumpridos con fartura.

Amigas e amigos, feliz curso 2009-2010.

Lupicinio Peña
Director

INFORMACION COMPLETA AQUÍ