COMEZAMOS UN NOVO CURSO!
Neste curso 2017-2018, esta é a composición do EDLG do centro:
Coordinador: Xulio C. Iglesias.
Representantes do profesorado:
  • Mª José Cabaleiro (Bacharelato).
  • Bibiana Martínez (ESO).
  • Cristina López (1º e 2º EP).
  • Manuel Pérez (3º e 4º EP).
  • Yolanda Diéguez (5º e 6º EP).
  • Mónica Souto (Infantil).
Representante do PAS: Rosa Mª Domínguez.
Representantes do alumnado: 1 vogal de Normalización Lingüística por aula en ESO-Bac. (=17).
Representantes das familias: María Sánchez e Elvira Moroño.
Seguro que deste equipo saen moitas propostas para dinamizar o uso do galego no noso centro!
 
 
BLOG DO EDLG: “COLOREANDO DE AZUL E BRANCO”.
Coñecedes o blog do EDLG de Salesianos Ourense?
Se empezastes no cole este curso ou se aínda non o coñecedes, visita o noso blog.
Se botades algo en falta ou tedes ideas para dinamizar o blog ou para enchelo de contidos interesantes, falade con calquera membro do equipo e porémonos mans á obra.
Lembrade que tamén podedes acceder a el desde o apartado de “blogosfera-centro-blog do EDLG” da páxina web do colexio (na pantalla, á dereita).
Esperamos que vos guste e vos anime a usar e aprezar máis aínda a nosa lingua.
 
 
CONCURSO DE LECTURA FREI MARTÍN SARMIENTO
Como vos presentamos nas reunión coas familias e nas aulas, xa está en marcha a XIV edición do Premio Frei Martín Sarmiento, organizado pola Comisión de Normalización Lingüística de Escolas Católicas de Galicia.
Como centro levamos xa moitos anos participando porque nos parece unha forma interesante de fomentar a lectura entre o alumnado, profesorado e familias (lembrade o que proxectamos na presentación: “El@s xa len, e ti?”), ademais de dar a coñecer obras publicadas en galego no último ano e compartir lectura con outras persoas das comunidades educativas doutros centros de Escolas Católicas de Galicia que tamén participan.
Por se vos animades a ler en galego e puntuar as obras de 0 a 10… Aquí van os títulos seleccionados para a presente edición:
  • Educación Infantil
PREGO, LUIS; Xogos musicais; Edicións do Cumio
MOURE, ANXO; Caramulo e a carpinteira de soños; Bahía edicións
  • 1ª categoría: 1º e 2º de Educación Primaria
FERRER, ÁNXELES; O sombreiro do mago; Ed. Xerais
SAMPAYO, ALEX E CAAMAÑO , BORJA F.; A nena que quería navegar; Redrum Teatro
  • 2ª categoría: 3º e 4º de Educación Primaria
CORTIZAS, ANTÓN; Zoonetos; Ed. Tambre-Edelvives
VILLAR JANEIRO, HELENA; Contos do sol e da lúa; Ed. Alvarellos
  • 3ª categoría: 5º e 6º de Educación Primaria
BABARRO, XOÁN; Hilario e os tres medos; Ed. Santillana
BAYORTI, ALEX; Tom, Hunck e o misterio da trabe de ouro; Urco editora
  • 4ª categoría: 1º e 2º de ESO
CAROU FIGUEIRA, NATALIA; A cova da moura; Bahía edicións
DÍAZ VALADARES, FRANCISCO; Tras a sombra do bruxo; Ed. Rodeira-edebé
  • 5ª categoría: 3º e 4º de ESO
PRADO, MIGUELANXO; Presas fáciles; El Patito editorial
TROUBS; A Alquitara; Ed. Figurandorecuerdos
  • 6ª categoría: bacharelato e adultos
RIVEIRO COELLO, ANTÓN; A ferida do vento; Ed. Galaxia
FRAGA, ANTONIO M. ; A virxe das areas; Edicións Embora
 
Lembrade que as autoras e autores das obras mellor valoradas polas persoas que lemos recibirán un premio que, polo que sabemos, gusta moito porque o se lles dá polas valoracións de quen lemos.
Animádevos a participar lendo en galego!
 
 
MAGOSTOS COLEXIAIS
Haberá algo máis noso que a festa do Magosto?
Neste curso tamén poderemos gozar desta festa tradicional tan propia de Ourense en todas as etapas.
Haberá actividades previas para coñecer mellor a tradición e preparar a festa nas aulas.
O venres 10 de novembro, desde Infantil ata Bacharelato celebraremos a festa nos patios do colexio.
Mirade que ben o pasamos!
 
Ver album de fotos do magosto 2017
 
FESTAS DE XOÁN BOSCO
No noso colexio estamos de festa!
Como cada 31 de xaneiro, en todas as casas salesianas celebramos a festa do noso fundador, Xoán Bosco.
Aquí podedes ver o programa, con actividades programadas por diferentes equipos e comisións do cole e outras organizadas desde a Parroquia de Mª Auxiliadora e a Asociación Xuvenil Amencer para todas e todos.
Gozade da festa. Viva Xoán Bosco!

Ver programa de festas de Xoán Bosco
 

24 DE FEBREIRO: DÍA DE ROSALÍA
Ver enlace

Neste curso tamén quixemos sumarnos á iniciativa da Asociación de Escritoras e Escritores en Lingua Galega (AELG) para celebrar o día do nacemento de Rosalía de Castro, a figura máis senlleira da literatura galega.
Foi unha celebración sinxeliña: Postais para Rosalía en EP e lectura pública de poemas da autora na fachada do colexio a cargo dos vogais de Normalización Lingüística de ESO-Bac.
Desde o EDLG convidámonos a coñecer mellor a figura de Rosalía, #AbrideAFiestra.
 
X XORNADAS DA LINGUA 2018: “EU FALO, TI PODES. INTÉNTAO!”.
Nesta décima edición das xornadas da lingua ofertarase durante a semana do 5 ao 10 de marzo as seguintes actividades:
* Ambientación de aulas, corredores, patios e portería
* Bos días radiofónicos e de televisión escolar interna do 5 ao 9 de marzo
* “Achegamento as mulleres galegas” a través das clases de inglés: Coñecer a biografía de mulleres galegas relevantes con exposición polos corredores do que traballaron nas aulas.
* “A mochila viaxeira” para Educación Infantil e 1º e 2º de E. Primaria: libros en galego que van de casa en casa para lelos en familia.
* Campaña de sensibilización, aprecio e revalorización da lingua galega entre o alumnado.
* Compromete co galego co posadoiro no EDLG nos recreos: gústame o galego porque... cada quen completa a frase e tira unha foto
* Proxecto televisión en galego nos recreos: Gravar vídeo (chistes, por que falar en galego, contar un conto...).
* Titorías de sensibilización sobre o galego para ESO-Bac. co xogo de palabras en liña “o preguntoiro”
* Enquisa ... por que non falas galego de cotío no cole?
* Contaxiar o uso da lingua galega tamén no ámbito empresarial, comercial … a través das familias do centro:
o Pegada de carteis “Mellor dito” nos establecementos de Ourense.
o Pegada de carteis “Nós atendemos en galego” nos establecementos de Ourense.
* Karaoke con “Uxía Lambona e a banda molona”, para cantar durante os recreos de EP.
* Encontros con… Celia Díaz Núñez, escritora ourensá, o martes 6 de marzo.
* Concurso “#gustodogalego”.
* II Concurso “Viñeta en branco”.
* Reparto de materiais didácticos entre o profesorado de Educación Infantil Educación Primaria, ESO e Bacharelato.
 
Como vedes, moitas das actividades son escolares, pero á charla-encontro de Celia Díaz Núñez estades todas e todos convidadas/os!
Ver cartel
 
 
 
DÍA DAS LETRAS GALEGAS
Un ano máis conmemoramos o 17 de maio lembrando a persoa á que se lle adica este día.
Nesta ocasión, ao longo da semana a través da radio televisión escolar “Bos Días” e tamén nas aulas, coñecemos un pouco mellor a figura de María Victoria Moreno.
Como noutras ocasións, o día 16 xuntámonos no patio para celebrar esta festa.
Repetimos o esquema doutros anos:
Música en galego (desta vez proxectada na pantalla que montamos no pavillón), unhas breves palabras dunha persoa convidade (nesta ocasión foi o profesor do colexio e antigo membro do EDLG, xa xubilidado, Jose Carlos González), presentación visual da biografía da autora por parte do alumnado de EP, compromisos do alumnado de ESO e 1º Bac. para empregar máis o galego no noso día a día, o desexo coreado por todas e todos de que haxa “Mil primaveras máis para o galego” e a proclamación do himno galego cantado por cantas persoas participamos no acto colexial.
E para rematar, entregamos un marcapáxinas máis para a vosa colección: o nome da autora homenaxeada, un textiño dela e as portadas dalgunhas das súas obras. Esperamos que vos gustara.
 
Album acto colexial Día das Letras Galegas 2018
 
 
FESTA DE Mª AUXILIADORA
Un ano máis, nós tamén celebramos o 24 de maio como en todas as presenzas salesianas do mundo!
Ao longo de todo o curso, a lembranza de María faise máis presente o 24 de cada mes, pero en maio respírase o ambiente de festa por toda a “mazá salesiana”.
Aquí podedes ver o programa, con actividades programadas por diferentes equipos e comisións do cole e outras organizadas desde a Parroquia de Mª Auxiliadora e a Asociación Xuvenil Amencer para todas e todos.
Gozade da festa. Viva María Auxiliadora!
Ver programa de festas María Auxiliadora 2018


   RSS
Política de Privacidad
CPR Plurilingüe María Auxiliadora (Salesianos)
Plaza Don Bosco, 1 32003 Ourense
Tel. 988 370 537
salesianos@salesianos-ourense.com
Visualq